2025 Day 287

 2025 Dedh Dew Cans Pajar Ügens ha Seyth

De Meurth, pajardegves mis Hedra
Tuesday, 14th October

Arhans hag owr, loos ha melyn, ew radn an liwyow en kidnyadh. My a gar ow gwedh, coth ha yonk, e'n lowarth. Martesen, thew an wedhen avalow ma an keth oos avel an chei. Ma meur a lîken loos ha glas warnedhy. Hei a veu òbma ken agan devedhyans. Solabres nag eus del war hy branchys. Bes whath nag eus lies delken kellys dhort an vasarnen. Bettegens, teg ew an del liwys codhys dhe'n dor. Ma rüdh ha purpur, ewedh. Na wra an godhes dor nevra gweles oll an liwyow teg. Mons ow triga en dadn an dor, ha dall ens, war neb coor. Pandr'üjy an godhes dor ow kil dadn agan lowarth? A wra anjei cavas owr raga nei?

Silver and gold, grey and yellow, are some of the colours in autumn. I love my trees, old and young, in the garden. Perhaps, this apple tree is the same era as the house. There is a lot of grey and blue-green lichen on it. It was here before our arrival. There are already no leaves on its branches. But still there are not many leaves lost from the maple. However, the coloured leaves fallen to the ground are beautiful. There is red and purple, too. The moles will never see the beautiful colours. They are living under the ground, and they are blind, anyway. What are the moles doing under our garden? Will they find gold for us?

Geryow rag hedhyw Words for today

bettegens however, nevertheless 

SWFMm byttegyns

dall blind

delen ~ delkyen (f) leaf < del (coll.)

devedhyans (m) arrival

en dadn an dor under the ground

liwys coloured

masarnen (f) maple, sycamore

solabres already 

war neb coor anyway

warnedhy ~ warnodhy on her, on it

whath still, yet